Hareid blir neppe den ivrigaste på klubben på overgangsmarkanden denne vinteren. Det er i sterk kontrast til i fjor, då a-laget og Hareid 2 til saman signerte nesten 30 spelarar. I år kan det sjå ut som at dei nye som kjem til er tidlegare Hareid-spelarar, som har vore vekke i kortare eller lengre periodar av ulike grunnar.

* Larsnes/Gursken og Ørsta blir nemnt som dei to laga som skal kjempe om 1.-plassen i 4.-divisjon i år. I Sande seier dei seg alt ferdige med spelarhandlinga. No har også Ørsta begynt å leite fram blåarka. Terje Haugen Øye spelte sist sesong i Sunnylven, og har også spelt for Hornindal og moderklubben Sæbø. No er han klar for Dagmund Evebø og co. Det same er ein annan Sæbø-kar; Yngve Frøland. Tredjemann inn er ein meir kjent kar. Venstrevingen Terje Rebbestad har spelt fleire sesongar i Volda, mellom anna då dei var i 2.-divisjon i 2004. Sidan gjekk han til Ørsta, før han i forfjor valte å gå til Åmdal. No er han tilbake i kvitt og svart. Ei solid investering.
* Stranda er tilbake i 3.-divisjon, og har tidlegare henta heim spissen Kato Vangen frå Volda. No er ein annan tidlegare Stranda-spelar tilbake; Joakim Relling. Han har dei siste sesongane spelt for Spjelkavik.
* Spjelkavik har tilsett Geir Hansen som trenar, men han verkar ikkje å ha for høge ambisjonar for sitt nye lag. I alle fall gir han ikkje uttrykk for det. Til Sumpen sa han denne veka at om det blir divisjonsomlegging så vil dei håpe å kome blant dei seks beste laga. Vika har ikkje planar om å hente så mange eksterne, men Langevåg-kaptein Espen Gresal er etter det vi har forstått på veg.

Hareid-kaptein Kim-Tore Husøy spelte fredag heile kampen då Hødd møtte Eid borte. Husøy vart plassert på midtbana, og spelte ifølgje Hødd-nettsida til godkjent. I slutten av månaden skal Hødd finne ut om dei vil prøve å knytte til seg Husøy, som har spelt 198 kampar for Hareid sidan debuten i 2002.

Hødd vann forresten kampen mot Eid 4-0. Ruben-Kenneth Brandal og Ørjan Engen Grimstad kom inn som innbyttarar.

Som tidlegare skrive har Vagn Scheide Mork utfordra Even Hansrud og Einar Orten Trovåg om å ha best resultat på O2-testen i februar. Og under testen (som eigentleg var for dei som ikkje tok den sist) fredag, gjekk Vagn opp drastisk og landa på 55.5, 3 poeng betre enn sist.
- Eg reknar løpet som køyrt no. Med denne framgangen har ingen av dei sjans til å ta meg. Men klart, dei kan jo få gjere eit forsøk, kommenterer Vagn.

Håkon Orten Trovåg var fredagens bestemann med heile 64.5, og legg seg derfor inn på ein 3.-plass samanlagt. Benjamin Reite (57) og Ådne Andersen (55) er framleis på topp med sine resultat frå førre veke.

Det kanskje mest overraskande var at Kjell Roger Skarshaug, som stort sett har gått skadd sidan 2006, ikkje gav seg før O2-opptaket viste 58. Mildt sagt imponerande.

Og som om ikkje det var nok. Den gamle Hareid-helten Remi Helleseth dukka opp på testen. Han landa på 51.5, men det mest gledelege var at han kom i det heile. Remi har vore ein av Hareids viktigaste spelarar dette tiåret, men trappa ned etter 2008. Luktar det comeback?

No når den verste kulden begynner å avta startar treningsrushet for alvor. Torsdag slo Norborg til med heile 11-2 mot 5.-divisjonslaget HaNo. Det stod 7-0 etter ein halvtime. No anar vi ikkje kor gode HaNo er, men vi får nok vere litt forsiktige med å prøve å tyde dette resultatet.

Onsdag vann AaFK junior 2-1 mot Spjelkavik. Vi håper forresten at norborg.com følgjer opp tradisjonen med "treningskamptabellar".

Vi kan også melde at slik det ser ut no blir Hareid - Åram/VanKam utsett frå torsdag 21. januar til fredag 22. januar. Vi kjem tilbake med meir info om kampen om eit par dagar.

For no tar midlertidig webredaktør seg ein tur til London for å sjå dei liljekvite vinne 9-1 mot Hull. Eller?

Cato Hansrud sluttar i Lokomotiv Oslo og flyttar heim igjen. Det melder lokomotivoslo.no i dag. Cato er Hareid-spelar Even sin eldre bror. Han spelte 62 kampar og scora 2 mål for Hareid før han flytta herifrå. Dei siste fem sesongane har han spelt for eksilsunnmørsklubben Lokomotiv Oslo. Han har fått med seg tre opprykk med klubben, frå 7.- til 4.-divisjon, og blir omtala som ein av dei mørkeblå sine beste spelarar nokon gong. Men no må "Loket" klare seg utan Cato, for han og sambuaren har fått seg jobb på Hareidlandet. Kor vidt han angriparen er aktuell for Hareid-spel veit vi ikkje enno.

Dei som ikkje deltok på O2-testen i Skeidehallen førre fredag, må i elden i morgon klokka 17.00 i same hall. Dei som deltok sist kan også møte opp og ta den igjen dersom dei vil. Gjer dei ikkje det, må dei ta seg ein joggetur.

Ein av dei som kjem til å ta testen på nytt er Vagn Scheide Mork. Som vi tidlegare har skrive kjempar han og Even Hansrud ein brutal kamp om kven som blir best av dei to. Men no har også fleire hive seg inn i kampen om å bli "beste outsider".
- Eg klarte 52.5 sist fredag, og for å leggje ytterlegare press på Even tar eg no testen på nytt. Han har satsa knallhardt på å ta meg, men vart skadd under ein joggetur her ein dag. Så han skal ikkje springe fredag, og det trur eg han irriterer seg veldig over. For då får eg to løp i beina før han har tatt sin første, seier Scheide Mork i ein kommentar til nettsida. Han kan også fortelle at han har utfordra ein ny mann i O2-konkurransen, og her er det både heider, ære og pengar inne i biletet.
- Den gamle avdanka fotballspelaren Einar Orten Trovåg trur at han skal klare å slå meg på testen i februar. Eg reknar dette som ganske lettente pengar. Einar er ikkje akkurat i sitt livs form, meiner Vagn.
Det bekreftar også den tidlegare fotballformannen. Men han har ingen tru på at han skal bli slått av den tidlegare volleyballspelaren Vagn Scheide Mork.
- Det går rykte på bygda om at Vagn er blitt observert både på Aktivsenteret og på Hødd-trening i det siste, berre for å slå meg og Even på denne testen. Men for å seie det slik så har eg aldri tapt eit veddemål mot Vagn. Eg vann mykje pengar frå han både under inne-KM og Grendacupen. Så eg trur han angra med ein gong vi avtala veddemålet. Greitt nok at eg er i relativt skral form no, men eg var godt trena for to-tre år sidan. Og eg kjem til å ta Vagn på rein vilje. Med 400-meteren min under Majonaden friskt i minne så veit Vagn at han må trene knallhardt for å ta meg i februar, kommenterer Trovåg. Som påstår at han kjem til å trene "litt, men ikkje mykje" for å ta Vagn.
- Eg gjer ikkje meir enn eg må. Gir han seg på level 14, så stoppar eg på level 15. Taper eg mot han i februar vil det vere mitt livs største nederlag.

Ingen av partane i saka ønskjer å røpe kor mykje pengar det er snakk om her, men beløpet skal vere "større enn nokon gong".

Vi har no forbetra historikken på nettsida, noko vi også fekk ein artikkel om i Vestposten for litt sidan. Vi har lagt inn tabell, resultat og spelarstatistikk frå alle sesongar frå 1980 og 2009. Unntaka er 1992, 1998, 2001, 2002 og 2007, der vi av ymse grunnar har nokon manglar. Vi har også lagt inn kjappe oppsummeringar av reservelaget sine sesongar på 80-talet. Neste oppgåve no for nettsida sin historikk-komité er å oppdatere "tillitsvald-adelskalenderen". Så vidt vi veit vart det gjort sist i 1997. Målet er at dei som sidan den gong har runda 5, 10, 15, 20 og kanskje til og med 25 år i fotballgruppa si teneste (trenar, støtteapparat, styre, arrangement +++) skal få pokal for det i løpet av 2010. Årsmeldingane vil bli brukt som rettesnor. Vi jobbar også med å oppdatere fotballgruppa si merittliste (sjekk venstremarg), slik at vi skal få litt kustus i pokalskapet nede på klubbhuset. Så veit du om pokalar av ymse slag som er vunne som ikkje er med i vår oversikt, så er det berre å ta kontakt med nettredaksjonen.

Onsdag var 3.- og 4.-divisjonslaga på Sunnmøre samla på Rica Parken Hotell i Ålesund. Einar Orten Trovåg stilte som Hareid sin representant. Møtet var todelt. Før pause informerte Bjørn Oskar Haukerberg (dagleg leiar i krinsen) om nye regelendringar som kan bli banka gjennom på forbundstinget i mars. Etter pause var det tradisjonelt terminlistemøte. Samlinga varte i ca. 2 x 45 minutt pluss tilleggstid.
Under den første delen av møtet vart det lagt opp til diskusjon og informasjon om den eventuelle divisjonsomlegginga (http://www.fotball.no/Kretser/sunnmore/Nyheter-2009/Januar/Foreslar-farre-3-divisjonsavdelinger/). Stemninga var generelt sett imot. Valder, Hareid og Rollon sine representantar var av dei som heldt innlegg om at dette ikkje er så lurt. Spesielt Stig Monsen hadde gode argument om å halde på dagens ordning. Den einaste heldt oppe handa då Haukerberg spurde kven som var for var Bergsøy sin representant. Når det gjeld terminlistemøtet så vart det ein del endringar på kampdagar, også for Hareid. Vi kjem til å legge ut endringane under A-laget 2010 i venstremargen. Den einaste kampen som ikkje er heilt spikra er augustmøtet med Spjelkavik.
PS. Kanskje noko overraskande stilte Svein Arve Alnes som ein av Godøy sine to menn på møtet. Han skal spele for SIF i år, men unnskyldte seg med at han ikkje har skrive under enno.
PS 2. Godøy har som desidert sistelag i 3.-divisjon lagt opp trenarkabalen. Jøgvan Valkvæ blir hovedtrenar, og med seg som assistentar får han broren Trond Valkvæ og Jan Ove Skodje. Jøgvan Valkvæ trena Godøy også i 2008, då dei for første gong klarte å halde plassen i 3.-divisjon. Det klarer han ikkje i år, meiner voldasupporter.com. Dei har alt tippa Godøy på 12. plass. Sjølv om dei ikkje ser veldig lyst ut ute på øya så trur heller ikkje vi at raudtrøyene får ein stor sesong, men som vanleg ventar vi med å fortelje deg kven som rykkjer ned til vi tar gjennomgangen i mars/april.

"Nye Hareid 2" hadde i dag si første trening. Den var heldt innandørs, og oppmøtet var ifølgje rapportane godt. Av spelarar som ikkje var med i fjor deltok Frank Robert "Kræda" Moldskred, Christian Aasmo, Arne Gunnar Nesset og Anders Eidsvik, pluss juniorane Arild Liaset og Robin Fure. Neste trening er onsdag 21.00 inne. Målet framover blir å finne ut om interessa er stor nok for å melde på eit lag til 5.-divisjon. Laget vurderer også å stille med eitt eller to lag på Oddencupen i Ulsteinhallen første helga i februar.

Alle som spelte på juniorlaget i 2009 må levere inn drakta si til Beate Riise Gaasø. Spelarane blir bedd om å ta ein ekstra kik i skapa sine, for det manglar ein del...

Hareid har no avtala å møte FK Sykkylven til generalprøve seks dagar før seriestart i 3.-divisjon. Kampen går på Hareidsmyrane stadion. No ser treningskampoversikta slik ut:

Torsdag 21. januar: Hareid - Åram/VanKam
Laurdag 30. januar: Hareid - Gursken/Larsnes
Laurdag 6. februar: Hareid - Hødd 2
Torsdag 11. februar: Hareid - Åram/VanKam (ikkje bekrefta)
Fredag 19. februar: Volda - Hareid
Laurdag 6. mars: Hareid - Langevåg
Laurdag 13. mars: Hareid - Skodje
Laurdag 20. mars: Hareid - Valder
Laurdag 27. mars: Hødd 2 - Hareid
Laurdag 10. april: Hareid - FK Sykkylven
(Fredag 16. april: Hareid - Godøy, SERIEOPNING)

Jan Robin Haraldsvik kjem innan kort tid til å signere for Hareid. 20-åringen spelte for Hareid i 2008. Han imponerte ved å score fire mål i treningskampane for a-laget, men bidrog mest for juniorlaget utover sesongen. Om hausten same år reiste han vekk på skule, og då han kom tilbake våren 2009 melde han seg inn i Hasungot der han fullførte sesongen. Haraldsvik har trena med Hareid no i tid, og trenar Bjørge Worren meiner han har gjort sine saker såpass bra at det er ingen grunn til å ikkje finne fram overgangspapira. Jan Robin kan spele både venstreback og venstrekant. Han blir den første signeringa til Hareid i 2010.

Trond Brynestad melder overgang frå Godøy til Volda, melder nettsida voldasupporter.com. Dermed har Godøy mista sine kanskje tre viktigaste spelarar i løpet av eit par dagar. Kenneth Kjevik går tilbake til Vigra, medan Svein Arve Alnes tar laust på sitt andre opphald i SIF.

Etter sesongslutt i fjor har det skjedd lite på Hareid 2-fronten, men no har ein gjeng tatt initiativ til å samle ein spelartropp og styre laget i 2010. Rune Husø Johansen blir hovudtrenar, med Espen Beiermann og André Egset Nupen som assistentar. Oppmanngruppa vi bestå av Frank Robert Moldskred og Kristian Angelsen. Denne gjengen vil prøve å få i gang treningar for å sjå om det er nok spelarar på plass før påmeldingsfristen til 5.-divisjon. Dersom det blir noko av laget er det grunn til å trur at opplegget vil likne fjoråret, med eigne treningar og heller lite spelarutveksling med a-laget.

I fjor hadde Hareid 2 ein god og sosial sesong. Laget leia lenge 5.-divisjon, men mista spelarar og enda på 5.-plass i avdelinga. HIL 2 gjekk også heilt til kvartfinalen i inne-KM.

går som vanleg 18.00.

Eventuelle forfall meldast på sms på til Bjørge på 917 52 386.

Treningskampen mot Åram/VanKam som var planlagt komande torsdag er utsett ei veke, det vil seie til torsdag 21. januar klokka 19.00. Grunnen er mannskapsmangel hos ÅVK. Dersom nokon vil spele mot Hareid komande torsdag så er det berre å gi lyd.

Godøy-spiss Kenneth Kjevik vender tilbake til moderklubben Vigra. Med det mistar Godøy ein av sine beste spelarar. Og Vigra er styrka i jakta på opprykket til 3.-divisjon som dei var så nære i 2009. Kjevik seier til Hareid IL Fotball Nett at han likevel trur at Godøy kjem til å bite bra frå seg i år, sjølv om både han og Svein Arne Alnes (SIF) har forsvunne. Godøy står framleis utan trenar, men ei løysing skal visst snart komme på bordet.

Som tradisjonen tilseier samlar vi også inn profilar med info om ulike aktørar i Hareidsfotballen. Det er vel vanleg å kalle det Spelarprofilar, men også trenarar, leiarar og andre rundt laget skal sende inn. Dei som ikkje har fått mail om det, kan sjå malen som ligg under A-laget 2010 og sende inn til trovaag@gmail.com. Vi har alt fått inn ein del profilar. Bilete vil bli teke ved eit anna høve.

* Godøy har no ein lang periode vore den einaste 3.-divisjonslaget som ikkje har lagt trenarkabalen for 2010. Etter det vi erfarer er det framleis ikkje avklara om lagets to beste spelarar, Kenneth Kjevik og Svein Arve Alnes, spelar for raudtrøyene i 2010. Førstnemnde vurderer å gå tilbake til moderklubben Vigra, medan Alnes framleis er ønska av SIF. Godøy blir nok ein av klubbane som kjem til å bli tippa i botnen av tabellen i år av ekspertane. Det er vel også grunn til at tru at mange kjem til å tippe Hareid og Norborg ned i der. Ingen av dei klubbane har hittil meldt om nemneverdige forsterkningar i høve 2009-stallane.
* Ein klubb mange ventar i toppen er Spjelkavik. Kanskje mest grunna at dei i fjor enda på 3.-plass, pluss at dei har henta inn den rutinerte trenaren Geir Hansen. Men Vika har mista fem rutinerte spelarar, mellom anna goalgetteren Tom Erik Olsbø til SIF. Hansen planlegg å hente inn to eksterne spelarar. Les Geir Hansen si nyttårshelsing her: http://idrett.speaker.no/organisation.asp?WCI=wiKlubbKassaNews&WCU=978758&CatId=140872
* I 4.-divisjon er det også berre eitt lag som manglar trenar; Skodje. Som Hareid forresten skal møte i treningskamp i mars. Men førebels har ein gjeng leia av Sumpen-journalist Eirik Hjelvik tatt ansvaret for gultrøyene til ein ny mann tar over roret. Skodje melder også at Bjørnar Aure, som blir rekna som laget sin beste spelar saman med nemnde Hjelvik, blir ute heile sesongen med ein skade. Ikkje heldig for Skodje, som er nye i 4.-divisjon av året.
* Dersom forslaget om ny serieordning går gjennom rykkjer berre eitt lag opp frå 4.-divisjon. Då kan det bli litt av eit rotterace. Skal vi komme med eit råtips no, så vil det stå mellom Gursken/Larsnes og Ørsta. Kor vidt det blir ny serieordning blir bestemt på forbundstinget i mars.